تاند (سې شنبه، د جوزا ۱۵ مه) افغانستان د کرکټ په نړیوال شل اوره جام کې خپله لومړۍ مسابقه په لوی توپیر وګټله.
د یوګنډا په وړاندې د افغانستان لوبډلې لومړی توپ وهنه وکړه او د ۵ ویکټو په تاوان یې ۱۸۳ منډې وکړې.
رحمان الله ګوربز په ۴۵ توپونو ۷۶، ابراهیم ځدراڼ په ۴۶ توپونو ۷۰ منډې وکړې.
د افغانستان د ۱۸۴ منډو د هدف په وړاندې د یوګنډا لوبډلې یوازې ۵۸ منډې وکړای شوې.
په توپ اچونه یا بولینګ کې فضل حق فاروقي خورا ښه لوبه وکړه. ده د یوګنډا ۵ مهم لوبغاړي وسوځول. له همدې کبله د مسابقې غوره لوبغاړی ونومول شو او ګوربز بیا د اغیزمن لوبغاړي جایزه وګټله.
فاروقي نه یوازې ۵ لوبغاړي وسوځول بلکې تر ټولو لږې منډې یې هم ورکړې. ده په ۴ اورونو کې ۹ منډې ورکړې. نوین الحق او راشد خان هم هر یوه دوه – دوه لوبغاړي وسوځول.