تاند (یکشنبه، د جوزا ۱۳ مه) له “پولیو څخه پاک افغانستان” ادارې اعلان وکړ چې سر له سبا (دوشنبې) به په ټول افغانستان کې د ماشومانو د ګوزڼ پر ضد د واکسین کمپاین پیل شي.
پولیو هغه ناروغي ده چې اوس په نړۍ کې یوازې په افغانستان او پاکستان کې محوه شوې نه ده.
دا خل د پولیو پر ضد د واکسیناسیون کمپاین د ډیورند کرښې په دواړو خواوو کې هممهاله تطبیق کېږي.
دغه سازمان د افغانستان له خلکو وغوښتل چې له فلج څخه د خپلو ماشومانو د ساتنې لپاره خپل ماشومان واکسین کړي.
«له پولیو څخه پاک افغانستان» په افغانستان کې د پولیو د نوي کمپاین د پیل اعلان نن (یکشنبې د جوزا ۱۳ مه) پر خپله ایکسپاڼه وکړ. په دې اعلان کې یې یادونه نه ده کړې چې دا کمپاین به څو ورځې دوام وکړي.
پرون په پاکستان کې د ماشومانو د ګوزڼ یا پولیو د مخنیوي پروګرام مسوولانو اعلان وکړ چې د افغانستان پولې ته په نژدې سیمو کې د واکسین یو اوونیز کمپاین پیلوي.
د پاکستان د پولیو د مخنیوي پروګرام وویل چې د خیبرپښتونخوا او بلوچستان ایالتونو په ۶۶ ولسوالیو کې تر ۵ کلونو کشرو ماشومانو ته د دوشنبې له ورځې واکسیناسیون پیلوي.
ویل کېږي چې د دې کمپاین په ترڅ کې به په خیبرپښتونخوا کې ۳ میلیونه او پنځه سوه شپېته زره ماشومانو ته واکسین ورکړل شي.
همداراز په بلوچستان کې اټکل کېږي چې یو میلیون او ۸ سوه ۸۴ زره ماشومان واکسین شي.
د رسمي راپورونو له مخې تېر کال په افغانستان کې د پولیو شپږ مثبتې پېښې ثبت شوې وې.
پوليو يو ويروسي انتاني ناروغي ده چې د پرنجي له لارې خپرېږي او اکثره تر پنځو کلونو کم عمره ماشومان اغېزمن کوي.
ډیری ناروغان هیڅ نښې نه لري، مګر لوړه تبه، د ستوني درد، سر درد، د زړه درد، د بدن درد او کانګې د پولیو عامې نښې دي.