تاند (یکشنبه، د جوزا ۵ مه) د افغانستان د سترې محکمې لپاره د طالبانو د رژیم ویاند عبدالرحیم راشد وایي، چې په وروستۍ تېره یوه میاشت کې دوی پر ۷۰ تنو د افغانستان په ۲۰ ولایتونو کې « شرعي حدود» تطبیق کړي دي.
هغه د دغو کسانو او ور باندې لګول شویو تورونو په اړه له زیاتو جزیاتو پرته ویلي، چې دا سزاګانې په کابل او ولایتونو کې تطبیق شوې دي.
د طالبانو دا ډول سزاګانې د دوی د پلویانو له هرکلي، خو د منتقدانو او د بشري حقونو د نړیوالو سازمانونو توندو مخالفتونو سره مخ شوي.
نیوکه دا ده، چې طالبان ځان « بشپړ او سوچه اسلامي نظام» ګڼي، خو د واک له انحصار او خپلو ملایانو ته د ټولو چارو له سپارلو سره یې د پراخ شوي اقتصادي او بشري ناورین پر وړاندې د مقابلې د ممکنه اقداماتو مخنیوی کړی؛ هغه څه چې د طالبانو د مخالفانو په باور، د « شرعي حدودو» د تطبیق له مدعي رژیم سره نه ښایي او دا ډول رژیم باید د خلکو د نس او ټولو نورو اړتیاوو د پوره کولو ظرفیت او تعهد ولري.
طالب چارواکي د دا ډول سزاګانو عملي کول د جرمونو د مخنیوي او ثبات حاکمولو لپاره اړین ګڼي، خو نړیوال بشري سازمانونه بیا داسې کړنو ته د « صحرایي محکمو او بشر ضدو کړنو» نوم ورکوي.
د تورنو قاتلانو قصاص، د اخلاقي او نورو جرمونو د تورنو پر وړاندې د درو او نورو سزاوو عملي کول د طالبانو لخوا د « شرعي حدودو» د تطبیق په نوم د کړنو عمده برخې دي.