تاند (۴ شنبه، د ثور ۱۹ مه) د افغانستان د برېښنا شرکت لپاره د طالبانو چارواکو ویلي، چې په تېر یوه کال کې له ګاونډیو هېوادونو د وارداتي برېښنا او د برېښنا تولید داخلي شرکتونو ته د برېښنا د پېر له درکه ټول پورونه ورکړي دي.
د یاد شرکت ویاند حکمت الله میوندي ویلي: ازبکستان ته ۱۰۵.۳ میلیونه، تاجیکستان ته ۷۱.۲ میلیونه، ترکمنستان ته ۶۴.۲ میلیونه او ایران ته ۴۸.۱ میلیونه امریکايي ډالر، دغه راز د برېښنا تولید داخلي شرکتونو ته ۳۶.۵ میلیونه امریکايي ډالر ورکړل شوي دي.
د نوموړي په خبره، تېر کال کې د ۳ میلیارده ۳۴۱میلیونه افغانیو په ارزښت د برېښنا د ۱۰۴ پروژو تړونونه لاسلیک شوي، د یو میلیارد او ۱۷۱ میلیونه افغانیو په لګښت د اجناسو ۲۶ پروژې او د ۶۵.۸ میلیونه افغانیو په لګښت ۹ ساختماني پروژې پلې شوې دي.
د برېښنا شرکت د عملیاتي چارو رئیس عبدالرحمن رحماني د کابل ولایت د تره خېلو د ۴۰ میګاواټو په ظرفیت او د ننګرهار ولایت حصار شاهي د ۴۰ میګاواټو په ظرفیت د سولري برېښنا تولید طرحې وروستي کول، په کندهار کې د سولري برېښنا ۸۰ میګاواټه په ظرفیت د دستګاه جوړولو، هرات کې د بادي برېښنا ۲۰۰ میګاواټه دستګاه جوړولو، بغلان کې د ډبرو سکرو څخه د برېښنا تولید دستګاه جوړولو، هرات، پنجشېر، کونړ او بادغیس ولایتونو کې د نیمه کاره پروژو بشپړولو ته د پانګوالو لیوالتیا، د یاد شرکت له نورې مهمې لاسته راوړنې وبللې.
د برېښنا شرکت چارواکو همدارنګه ویلي، چې له یو شمېر پخوانيو زوراکو او سیاسیونو څخه چې د دغه شرکت پوروړي وو کابو ۱۸۶ میلیونه افغانۍ راټولې کړي او د پاتي پورونو د راټولولو په موخه طرحه جوړه شوې، چې د طالبانو د عمومي مشر له کتنې او تائید وروسته به یې په اړه پرېکړه وشي.