تاند ( ۲ شنبه، د ثور ۱۷ مه ) د طالبانو د رئیس الوزرا د سیاسي مرستیال مولوي عبدالکبیر دفتر ویلي، چې روسیې طالبان د تاتارستان په کازان کې یوې جوړیدونکې نړیوالې ناستې ته د ګډون لپاره بللي دي.
د سرچینې د معلوماتو له مخې، دا بلنه په کابل کې د روسیې سفیر دیمیتري ژیرنوف له مولوي کبیر سره د لیدنې پر مهال شریکه کړې ده.
سرچینه زیاتوي، چې روسي سفیر مولوي کبیر ته د دې ناستې په اړه معلومات هم وړاندې کړي، خو د طالبانو په اعلامیه کې د دغو معلوماتو جزیات نه دي خپاره شوي.
معلومه نه ده، چې دا ناسته د کومې موضوع لپاره کله ترسره کیږي او په کومه سطحه د طالبانو استازي وربلل شوي.
طالبانو دا هم نه دي ویلي، چې دوی دا بلنه منلې او کنه؟
ویل شوي چې روسي سفیر د طالبانو رژیم سره د اړیکو د پراختیا ټینګار کړی او طالب لوري روسي پانګوال په افغانستان کې پانګونو ته بللي دي.