تاند (شنبه، د ثور ۱۵ مه ) د امریکا د سولې انسټيټیوت د یوه راپور په خپرولو سره له افغانستان او پاکستان څخه د ترهګرۍد ګواښونو پراخیدو  اندیښنه ښودلې ده.

د امریکا د سولې انسټيټیوت د معلوماتو له مخې، دوی به د مۍ په ۱۴مه په دې اړه خپل وروستی راپور وړاندې کړي او له ترهګرۍ سره د متحده ایالاتو د مبارزې پالیسي لپاره به د پام وړ، ارزانه او دوامداره لاره وڅيړي.

په دې راپور کې دغه شان راغلي، “د طالبانو لخوا ترهګرو ډلو ته د پټنځایونو برابرول او د هغوی د افراطي ایډیالوژۍ ترویج هم د ترهګرۍ پر ضد د مبارزې پر وړاندې ننګونې، رامنځته کوي. “

بل لور ته: د امریکا د کانګرس د بهرنیو اړیکو د کمیټې مشر مایکل مک کال هم له افغانستانه د امریکا له وتلو وروسته، په دې هیواد کې د اسلامي ډلې (داعش) خراسان څانګې او القاعده د حضور د پراخیدو په اړه اندیښنه څرګنده کړې.

 په افغانستان کې د طالبانو حاکم رژیم دغو تازه څرګندونو ته غبرګون نه دی ښودلی، خو مخکې یې په افغانستان کې د ترهګرو ډلو موجودیت او خطر رد کړی.

د افغانستان په اړه په وروستیو کې د یو شمېر نړیوالو سازمانونو او هېوادونو ورته څرګندونې زیاتې شوي، خو طالب چارواکي یې په پرله پسې په غبرګون کې څرګندونې بې اساسه ګڼي او د بشپړ امنیت او ټولو وسله والو ډلو د مهارولو ادعا کوي.