تاند: (۵ شنبه، د ثور ۱۳ مه) پاکستان کې د شخړو او امنيت د مطالعاتو یوې څيړنيزې ادارې ویلي، چې په تېره اپریل میاشت کې د بېلابېلو پېښو له امله د ۳۱ پاکستاني ځواکونو په ګډون ۷۰ تنه وژل شوي.
د پاکستان انسټيتیوټ فار کانفلیکټ اینډ سیکيورټي سټډیز (پيکس) په نوم نا دولتي ادارې په دې اړه خپاره کړي راپور کې لیکلي: اپریل کې د 77 وسله والو حملو له امله د ۳۱ امنیتي کسانو په ګډون ټول 70 تنه وژل شوي او په ټولو 77 حملو کې 73 فيصده، 56 بريدونه يواځې په خېبرپښتونخوا کې شوي دي.
راپور کې نه دي ویل شوي، چې په مشخص ډول د دغو بریدونو زیاته برخه کومو ډلو ترسره کړي، خو د پاکستان د طالبانو تحریک او بلوڅ ازادي غوښتونکي تر ډېره د دغه هېواد د نا امنیو مسوولیت پر غاړه اخلي.
پاکستاني چارواکي وخت پر وخت ادعا کوي، چې د دغه هېواد د نا امنۍ ریښې د طالبانو تر کنټرول لاندې افغانستان کې دي، خو طالب چارواکو دا ادعاوې بې اساسه ګڼلي او ویلي چې پاکستان د خپلو مسوولیتونو د ترسره کولو پر ځای پر دوی د خپلو ملامتیو د اچولو هڅه کوي.