تاند (۲ شنبه، د ثور ۱۰ مه) له هغې وروسته، چې په ځینو رسنیو او ټولنیزو رسنیو کې د پخواني جمهوري نظام د لوړپوړو چارواکو او یو شمېر سیاسي څېرو پر ضد د کورنیو چارو د پخواني وزیر مسعود اندرابي له سپکاوي ډک غږیز کلېپونه او لیکنې خپاره شول، هغه ته نږدې سرچینو ویلي چې ښاغلی اندرابي له رواني روغتیا بې برخې شوی.

د راپورونو پر اساس، مسعود اندرابي په امریکا متحده ایالتونو کې اوسیږي او د رواني روغتیا د خرابوالي له امله یې د پخوانیو چارواکو او یو شمېر مشهورو څېرو خلاف توندې او له سپکاوي ډکې خبرې پيل کړي.

اندرابي ته یو شمېر نږدې سرچینو دا هم ویلي، چې هغه د ناسم اقتصادي وضعیت له امله د خپلې درملنې وس نه درلود، چې له دې امله یې روحي – رواني فشارونه نور هم زیات شوي.

یو شمېر سیاسي څېرو هم د هغه په ځواب کې نوموړي ته له سپکاوي ډکې خبرې کړي، چې د دغو لوریو خبرې د ټولنیزو رسنیو په یو تود بحث بدل شوی.

یو شمېر افغانانو بیا د اندرابي په اړه ویلي، چې له صداقت او درده یې رواني روغتیا له لاسه ورکړې او توندو خبرو ته مجبور شوی.

ځینو فعالانو له خلکو غوښتي، چې د هغه شخصیت ته د درناوي او وضعیت سره یې د خواخوږۍ لپاره د نوموړي غږیز او نور کلېپونه او لیکنې له یو بل سره تبادله او بحث نه کړي.