تاند (دوشنبه، د ثور ۳ مه) د کډوالو او بېرته راستنېدونکو چارو وزارت نن (دوشنبې) وویل، له ایران څخه ۲۶۰۰ ایستل شوي افغان کډوال پرون او وړمه ورځ هیواد ته راغلل.
د دغه وزارت پر اساس، دا کډوال د اسلام کلا بندر له لارې افغانستان ته راستانه شوي دي.
د کډوالو او بېرته راستنېدونکو چارو وزارت په یوه بله خبرپاڼه کې ویلي چې له پاکستان څخه هم لږترلږه ۶۷۰ کډوال پرون (شنبې) هیواد ته راغلل.
پاکستان د اپریل له دوهمې نېټې څخه د افغان کډوالو د ایستلو دوهم پړاو پیل کړی دی.
د کډوالو چارو وزارت په وینا، پرون د سپین بولدک او تورخم له لارو ۱۲۵ کورنۍ، چې ۶۷۰ تنه پکې شامل وو، هیواد ته راستنې شوې. د هغو په منځ کې ۳۸۹ د سپین بولدک او ۲۸۱ تنه د تورخم له لارې راغلل.
د اکتوبر له میاشتې چې پاکستان د افغان کډوالو د ایستلو بهیر پیل کړی دی تراوسه شاوخوا ۶ لکه افغان کډوال له دغه هیواده افغانستان ته راغلي دي.