تاند (چارشنبه، د حمل ۲۲ مه) له هغې وروسته چې ځینو رسنیو د طالبانو د کندهار مېشتي عمومي مشر ملا هبت الله اخوند زاده او نورو چارواکو د امنیتي اندېښنو خبرونه خپاره کړل؛ د دې ولایت لپاره د طالبانو ولایتي ادارې په یوه اعلامیه کې خلکو ته د امنیت ډاډ ورکړی او ویلي، چې اختر دې په ډاده زړه ونمانځي.
په کندهار کې د طالب مشر د امنیتي اندېښنو ادعاوې له هغې وروسته خپرې شوې، چې ویل کیږي هغه په فضا کې د امریکا د بې پيلوټه الوتکو له زیات شوي څارګر فعالیت او په ځمکه کې د داعش ډلې د بریدونو احتمال اندېښمن کړی.
د روژې په وروستیو اوونیو کې داعش ډلې په کندهار کې له نوي کابل بانک څخه د معاش ترلاسه کوونکو طالبانو د وژلو په هدف د یوه خونړي ځانمرګي برید مسوولیت ومانه.
په دې برید کې د طالبانو تر څنګ د ګڼو ملکیانو د مرګ ژوبلې خبر هم ورکړل شوی و.
اوس د طالبانو ولایتي ادارې ویلي، چې ځواکونو ته یې د امنیت ساتلو ځانګړي اوامر ورکړي او خلک له کومې اندېښنې پرته په دې ولایت کې اختر نمانځلی شي.
طالب چارواکو د افغانستان په نورو سیمو کې هم د اختر لپاره د خاصو امنیتي ترتیباتو خبر ورکړی.