تاند (دوشنبه، د حمل ۲۱ مه) د افغان سیکانو اوهندوانو یو مشر او په پخوانۍ ولسي جرګه کې د دوی استازی ناریندرا سینګ خالصه هیواد ته راستون شو.
ښاغلی خالصه د جمهوري نظام له پرزېدو وروسته کاناډا ته تللی و.
د طالبانو تر کنټرول لاندې ملي راډیو تلویزیون له افغان شخصیتونو سره د تماس د کمیسیون په قول د خالصه د بېرته راستنېدو خبر ورکړ خو ده په خپله تراوسه پورې په دې اړه څه نه دي ویلي.
د طالبانو له واک ته رسیدو وروسته ډېر افغان هندوان او سیکان له هیواده ووتل خو په وروستیو کې د طالبانو د عدلیې وزارت د سیکانو او هندوانو استازو ته ژمنه ورکړه چې د دوی شتمنۍ به له غصبه ورته خلاصې کړي او دې مسلې هندوان او سیکان هیله من کړي دي.
په افغانستان کې اوس د پاته هندوانو او سیکانو شمېر شاوخوا ۷۰۰ اټکل کېږي حال دا چې پخوا لسګونو زرو ته رسیده.