تاند (دوشنبه، د حمل ۲۰ مه) د لغمان لپاره د طالبانو سیمه ییزو چارواکو ویلي، چې په دولت شاه ولسوالۍ کې پرون د یوې ترافیکي پېښې له امله لږ تر لږه ۳ تنه وژل شوي او ۱۰ نور ټپیان دي.
د دغه ولایت لپاره د طالبانو د رژیم د اطلاعاتو او فرهنګ رئیس عبدالنور رسولي په دې تړاو نور جزییات نه دي ورکړي.
معلومه نه ده، چې د پېښې مړه او ټپیان ملکي که غیر ملکي وګړي دي او پېښه څه ډول رامنځته شوې ده.
ترافیکي پېښې په افغانستان کې د مرګ ژوبلې له تر ټولو اصلي لاملونو ګڼل کیږي او هره یا یوه ورځ وروسته خامخا له دې امله د یو شمېر کسانو د مرګ ژوبلې خبر ورکول کیږي.
د ترافیکي قوانینو نه رعایت، په دې اړه د اصولو د تطبیق نه څار، د موټر چلولو د اسنادو نه لرل یا یې په جوړولو کې درغلي، د لارو خرابوالی، د موټر چلوونکو بې احتیاطي او د ترافیکي پېښو پر عاملانو د قانون نه تطبیق په دې برخه کې له عمده ستونزو ګڼل کیږي.
څو اوونۍ مخکې د طالبانو ریاست الوزرا خبر ورکړ، چې د کابینې په غونډه کې یې کورنیو چارو وزارت د ترافیکي پېښو د مخنیوي طرحه وړاندې کړه، چې وزیرانو تایید او د عملي کېدو پرېکړه یې وکړه.
تر اوسه د دې طرحې جزییات او د عملي کېدو په تړاو معلومات نه دي رسنیز شوي.