تاند (  یکشنبه، د حمل ۱۹ مه) د پاکستان پخواني صدراعظم عمران خان په یوه تازه پيغام کې په ضمني ډول د دغه هېواد د پاشل کېدو خبرداری ورکړی.

نوموړي د پاکستان په اډیاله زندان کې خبریالانو ته د خبرو پر مهال ویلي، چې د ختیځ پاکستان د پېښې په شان بله پېښه په رامنځته کېدو ده.

هغه دا هم ویلي، چې هغه مهال له شېخ مجیب الرحمان سره د ګټلو ټاکنو پایلې ونه منل شوې، چې پایلې یې ټولو ولیدې.

شېخ مجیب الرحمان له پاکستان څخه د بنګله دېش د جلا کېدو موسس و.

هغه په 1971  کې د پاکستان ټاکنې وګټلې، خو د وخت واکمن جنرال یحیی خان ورسره پایلې ونه منلې او مجیب الرحمان یې په غبرګون کې له پاکستان څخه د بنګله دېش د جلا کېدو مبارزه او جګړه وکړه.

عمران خان په دومره روښانه ټکیو دا قضیه نه ده بیان کړې، خو اشاره یې همدې تاریخي پېښې ته وه.

هغه، چې له واکه د ګوښه کېدو او بندي کېدو تر قضیې یې ټولو کې د پاکستان پوځ او استخبارات ښکېل ګڼي، ادعا کوي چې په لوی لاس دی او ګوند یې څنډې ته شوي او دا کار به په لویه کچه د پاکستان له برخلیک سره لوبې کول وي.

د پاکستان واکمن حکومت، چې د عمران خان پرځونکی او مخالف دی، د هغه څرګندونو ته غبرګون نه دی ښودلی.

تر دې مخکې، په افغانستان کې د طالبانو د واکمن رژیم د بهرنیو چارو وزارت سیاسي مرستیال شېرمحمد عباس ستانکزي هم دوی سره د پاکستان ناندریزو اړیکو ته په یوه تبصره کې خبرداری ورکړی و، چې د پاکستان روان چلند به د دغه هېواد له واکمنۍ څخه د بنګله دېش د قضیې په شان د پاکستان د بیا ټوټه کېدو سبب شي.

د ستانکزي اشاره ډیورنډ فرضي کرښې ته وه، چې د طالبانو د رژیم په ګډون اکثریت افغانان یې پاکستان سره رسمي سرحد نه ګڼي او وايي آخر به دغه کرښه له منځه وړل کیږي او لر و بر افغانان به سره یو شي.