تاند (سې شنبه، د حمل ۱۴ مه) روسي رسنیو خبر ورکړی، چې دغه هېواد د ترهګرو ډلو لپاره له خپل نوملړ څخه په افغانستان کې د واکمنو طالبانو پر نوم پاکولو غور کوي.
د روسیې تاس خبري اژانس، د دغه هېواد د بهرنیو چارو وزارت له قوله دا خبر ورکړی.
ویل شوی، چې په دې تړاو د روسیې د بهرنیو او عدلیې وزارتونه څېړنې او بحثونه کوي او په پام کې ده، چې خپلې ارزونې د روسیې سیاسي رهبرۍ سره شریکې او هغه په دې تړاو پرېکړه وکړي.
د طالبانو واکمن رژیم د دغه خبر په تړاو څه نه دي ویلي.
تر دې مخکې قزاقستان، چې د منځنۍ اسیا د نورو هېوادونو په شان د روسیې تر اغېزې لاندې هېوادونو څخه ګڼل کیږي، په یوه ورته اقدام کې د طالبانو د ډلې نوم د ترهګرو ډلو له نوملړ څخه لیرې کړی و.
طالبانو له نورو هېوادونو او نړیوالو سازمانونو هم وخت پر وخت، د دوی په تړاو د ورته پرېکړو غوښتنې کړې دي.
روسیه د طالبانو له بیا واک ته رسېدو د مخه لا، دوی سره په پټ ملاتړ او تمویل تورنه شوې ده.
دغه هېواد له دې سره سره، تر اوسه د طالبانو نوم له ترهګرو ډلو نه دی جلا کړی او ویل کیږي، چې له دې پلوه یې قیودات ورباندې حاکم دي.
دا په داسې حال کې ده، چې د لویدیز یو شمېر هېوادونه او په سر کې امریکا بیا- بیا د طالبانو تر واک لاندې افغانستان څخه د ترهګرو ډلو او په ځانګړي ډول د داعش او القاعدې ډلو د خطر د موجودیت او پراختیا ادعاوې لري.
دوی د طالبانو له رژیم څخه په دې تړاو له نړیوالو سره د کړو ژمنو عملي کول غواړي.
طالب چارواکو بیا په دې اړه ادعاوې رد کړي.
د روسیې ځینو چارواکو هم وخت پر وخت ورته څرګندونې کړي، خو سیاسي دستګاه یې معمولاً د طالبانو له کړنو او ترهګرۍ سره د مبارزې په برخه کې اقدامات ستایلي دي.
لویدیز هېوادونه او د طالبانو مخالفان ادعا لري، چې د روسیې د پلازمېنې مسکو د موسیقۍ پر یوه تالار د وروستي خونړي برید عاملان هم، چې د داعش ډلې د خراسان څانګې په وینا، د دوی کسان وو، له افغانستانه سرچینه اخلي.
طالبانو بیا یاد شوی برید غندلی او قربانیانو سره یې خواخوږي څرګنده کړې ده.