تاند (شنبه، د حمل ۱۱ مه) په تعلیمي برخه کې فعالیت کوونکو موسسو ته د طالبانو رژیم د مزاحمت له ادعاوو سره سره، په لوګر کې د دوی د رژیم چارواکو ویلي، چې وایفا موسسې ته یې د ۲۶۲ سیمه ییزو درسي ټولګيو د جوړولو اجازه ورکړې ده.
د لوګرد پوهنې ریاست ویاند شاهپور عرب ویلي،، چې یادې موسسې د پوهنې له وزارت سره په همغږۍ د لوګر پوهنې ریاست په برخه کې خپل فعالیت پیل او له زده کړو پاتې شویو ماشونو ته یې ۲۶۲ سیمه ییز ټولګي جوړ کړي دي.
د طالبانو رژیم نه یوازې دا چې په دولتي ښوونځیو او خصوصي تعلیمي مرکزونو کې له شپږم ټولګي څخه پورته عمر لرونکې نجونې له زده کړو منع کړي؛ بلکې د یو شمېر نړیوالو موسسو لخوا یې په کورونو کې دوی ته جوړ شوي درسي ټولګي هم منع کړي.
په دې ترڅ کې څو میاشتې مخکې طالب رژیم په سویلي ولایتونو کې د یونیسف ادارې لسګونه درسي ټولګي وتړل او هم یې تازه د سویډن موسسې پر فعالیتونو چې یوه عمده برخه یې تعلیمي هڅو ته ځانګړې وه،، بندیز ولګاوه.
د نورو افراطي پرېکړو او کړنو تر څنګ د نجونو زده کړو ته د طالبانو د رژیم ممانعت جوړول په ملي او نړیواله کچه د دوی په اړه مخالف دریځونه پياوړي کړي.
د طالبانو منتقدان د دوی لویدیز ملاتړي او په کور دننه مبلغین نقدوي، چې د طالبانو د بدلیدو په اړه یې تبلیغات بې اساسه وو .
له دې سره، د طالبانو پلویان د دوی د ځینو چارواکو څرګندونو ته په اشارې وایي چې لویه برخه طالب مشران د نجونو د زده کړو او د ښځو د جقونو په ګډون زیاتو مسایلو کې نرم دریځ لري، مګر په کندهار کې د دوی عمومي مشر ملا هبت الله او ځانګړې ډله یې طالب رژیم انحصار کړی او خپلې افراطي پرېکړې پرې تحمیلوي.