تاند (شنبه، د حمل ۱۱ مه) د طالبانو د کورنیو چارو وزارت ویاند عبدالمتین قانع له نړیوالې ټولنې شکایت لري، چې ګواکې د نشه یي توکیو پر وړاندې مبارزه کې د دوی رژیم سره همکاري نه لري.
قانع په هېواد کې د نشه يي توکو د صنعتي تولید د زیاتېدو په تړاو له اندېښنو سره هم مهاله وايي، د نشه يي توکو صنعتي تولید د ګاونډيو او د سیمې له هېوادونو افغانستان ته رالېږدول شوی دی.
دغه طالب ویاند زیاتوي، د هېواد په ځينو برخو کې په پټه د ځينو کسانو له لوري صنعتي نشه يي توکي تولیديږي؛ خو په وینا یې د هغو د موندنو لپاره هم هڅې روانې دي.
مخکې د طالبانو د کورنیو چارو وزیر سراج الدین حقاني په مشخص ډول له نړیوالو غوښتي وو، چې ورسره د نشه یي توکو پر وړاندې مبارزه کې څو میلیارده ډالره مرسته وکړي.
طالب چارواکي بیا- بیا ادعا کوي، چې د نشه یي توکو پر وړاندې یې قاطع او بریالۍ مبارزه کړې.
یو شمېر نړیوال سازمانونه، په دې اړه د طالبانو ادعاوې تاییدوي، خو ځینې نور او د سیمې هېوادونه بیا زیاتوي چې لا هم له افغانستانه د نشه یي توکو د قاچاق لړۍ ورته دوام لري.