تاند (شنبه، د حمل ۱۱ مه) د کانونو او پټرولیم وزارت لپاره د طالبانو د رژیم سرپرست شیخ شهاب الدین دلاور، د مس عینک کان د قراردادي شرکت له رئیس ښاغلي «سانګ» سره په لیدنه کې د یادې پروژې د عملي چارو د ژر پیل غوښتنه کړې ده.
د دلاور دفتر د يوې خبرپاڼې په خپرولو سره ویلي چې په دې کتنه کې د مس عینک کان اړوند بېلابېلو موضوعاتو په اړه خبرې شوې دي.
سرچینې د نورو خبرو په تړاو جزییات نه دي ورکړي او نه ده معلومه، چې د قراردادي شرکت رئیس د مس عینک پروژې د چارو د نه پيل دلیل څه ښودلی؟
د طالبانو له بیا واک ته رسېدو څه باندې دوه نیم کاله کیږي، چې په ترڅ کې یې د دوی چارواکو بیا- بیا د مس عینک پروژې د ژر پيل خبر ورکړی، خو تر اوسه په دې برخه کې کوم عملي ګام نه تر سترګو کیږي.
د طالبانو منتقدان دوی تورنوي، چې په وینا یې د جمهوري نظام د چارواکو په شان د لویو پروژو د پيل په تړاو خلک تېر باسي او عمل کې د پام وړ څه نه لري.
په مس عینک کان کې د پانګونې او د دغه کان د را ایستلو قرارداد د ۲۰۰۸ز کال د اپرېل په ۲۵مه له MCC چینايي کمپنۍ سره لاسلیک شو. دا قرارداد د ۳۰ کلونو لپاره و. که څه هم د قرارداد د لاسلیک ډېر وخت کېږي، خو تر اوسه په بېلابېلو دلایلو د دې پروژې عملي چارې نه دي پيل شوي.
د جمهوري نظام پر مهال د دې پروژې د نه پیل اصلي دلیل د اوسنیو واکمنو طالبانو لخوا وسله وال مزاحمت ګڼل کېده، خو اوس باور دا دی چې اړوند شرکت د طالبانو د رژیم د نه رسمیت له امله د عملي چارو پيلولو ته زړه نازړه دی.