تاند (پنجشنبه، د حمل ۲ مه) د امریکا متحدوایالتونه وايي، که پاکستان د فبرورۍ د اتمې نېټې په انتخاباتو کې د درغلیو په اړه پلټنې ونه کړي، د دوو هیوادونو ترمنځ اړیکې به خړپړې شي.
د جنوبي اسیا په چارو کې د امریکا د متحدوایالتونو جګپوړي استازي دونالډ لو د کانګریس غړیو ته وویل، واشنګټن په پاکستان د کې د فبرورۍ د اتمې نېټې د انتخاباتو د بهیر او د ایکسپاڼې په شمول د ټولنیزو رسنیو او مطبوعاتو د سانسور او مخنیوي په اړه «جدي» اندېښنه لرلې ده.
د پاکستان په انتخاباتو کې او تر انتخاباتو مخکې د درغلیو او لاسوهنو ګڼ راپورونه خپاره شول. خو له دې سره سره د تحریک انصاف ګوند کاندیدانو پکې ډېرې چوکۍ وګټلې.
د انتخاباتو د پایلو له اعلانه وروسته د پاکستان د انتخاباتو یوه کمیشنر رسنیو ته اعتراف وکړ چې په انتخاباتو کې یې درغلي کړې او د ځان لپاره د سزا غوښتنه کوي.
د انتخاباتو کمینشر وویل، ده په خپله په راولپنډۍ کې د رایو درغلي څارله او بایلونکي یې په ګټونکو بدل کړي.
د انتخاباتو کمیسیون د دغه کمینشر څرګندونې رد کړې.
تر دې مخکې د امریکا د کانګریس یو شمېر غړیو ویلي و، تر څو چې د پاکستان په انتخاباتو کې د درغلۍ او لاسوهنې په اړه څېړنې ونه شي، باید د پاکستان نوی حکومت په رسمیت ونه پېژندل شی.
د جنوبي اسیا لپاره د امریکا جګپوړی سفیر دونالډ لو وايي چې امریکا به پر پاکستان هیڅ راز وسلې یا نوي تجهیزات ونه پلوري.