تاند (شنبه، د حوت ۲۶ مه) د ننګرهار د عامې روغتیا ریاست ویندوی نقیب الله رحیمي رسنیو ته وویل، دا ماشومان د ننګرهار په حوزوي روغتون کې دنیا ته راغلل.
په پنځو نوزېږو کې یوه نجلۍ او ۴ نور هلکان دي.
ډاکتران وايي چې تراوسه د ټولو زېږېدلیو ماشومانو روغتیايي وضعیت ښه دی.
د ننګرهار د عامې روغتیا ریاست او نورو طالب چارواکو تراوسه پورې په دې اړه څه نه دي ویلي چې د ماشومانو له مور و پلار سره به څه مرسته وکړي.
په یو وار د پنځو زېږېدلو ماشومانو پالنه د یوې کورنۍ لپاره له اقتصادي پلوه ګرانه ده. په نورو هیوادونو کې له دې ډول میندو سره دولتونه مرسته کوي.
تر دې پخوا هم په ځلونو په یو وار د پنځو او څلورو ماشومانو د زېږولو خبرونه ترلاسه شوي دي.
په ۲۰۱۷ م کال په پکتیکا کې یوې مور ۵ ماشومان وزېږول.
تېره میاشت (د دلوې لومړۍ – د فبرورۍ ۲۰مه) په میدان وردک ولایت کې یوې ښځې څلور ماشومان وزېږول.
هماغه مهال د میدان وردک ولایت د عامې روغتیا ريیس ډاکتر محمد زړک ځیرک رسنیو ته وویل چې څلور واړه ماشومان بې له دې چې جراحي عملیاتو (سزارین) ته اړتیا پیدا شي، په طبیعي ډول زېږېدلي دي.