تاند (جمعه، د حوت ۲۵مه) د طالبانو د پاسپورت اداره وايي چې په دوو میاشتو کې یې نژدې دوه میلیارد افغانۍ ګټلي دي.
د طالبانو د کورنیو چارو وزارت ویندوی مفتي عبدالمتین قانع پرون وویل چې په دغه وزارت پورې اړوند د پاسپورت ریاست دا پیسې یوازې د فبرورۍ او مارچ په میاشتو کې ترلاسه کړي دي.
د ده په وینا، د پاسپورټ ریاست په یوه میاشت کې ۳ لکه ۲ سوه شپږ زره پاسپورتونه صادر کړي او په دې توګه یې د میاشتې نژدې یو میلیارد افغانۍ د دولت خزانې ته ګټه رسولې ده.
ښاغلي قانع په دې اړه څه نه دي ویلي چې ولې دومره ډېر افغانان پاسپورت اخلي، په داسي حال کې چې د پاکستان په شمول هیڅ هیواد افغانانو ته په اسانه ویزه نه ورکوي.