تاند ( جمعه، د دلوې ۲۷مه) د ملګرو ملتونو د سازمان ویاند ستیفن دوجاریک وایي، چې د افغانستان په اړه د دوحې د روانې اوونۍ غونډه کې به د افغان مېرمنو ګډون حتمي وي.
نوموړي ویلي: څرنګه مو چې وویل د استازو او د مدني ټولنې د ډلو تر منځ به یوه غونډه وي، چې البته افغان میرمنې به پکې ګډون ولري. دا ډېره مهمه ده چې په دغو غونډو کې د افغان مېرمنو غږ واورېدل شي. “
د ملګرو ملتونو په کوربه توب د افغانستان په اړه د دوحې غونډې ته دوه ورځې پاتې دي.
دا غونډه د بیلابیلو هیوادونو د استازو په حضور کې د افغانستان د وضعیت په اړه د بحث لپاره د فبرورۍ په ١٨مه او ١٩مه د قطر په مرکز دوحه کې جوړیږي.
معلومه نه ده، چې په دې غونډه کې د افغان مېرمنو او مدني فعالانو په استازیتوب څوک بلل شوي او د بللو معیار یې څه دی؟
تر دې مخکې د افغان مېرمنو او فعالانو په نوم غونډو ته بلل شویو کسانو د بللو پر څرنګوالي زیاتې نیوکې شوې دي.
په کابل کې د طالبانو واکمن رژیم په دغه غونډه کې خپل ګډون مشروط کړی او ویلي، چې دوی پکې مانا داره ګډون غواړي.
ویل کیږي، چې د طالبانو د مخالفت یو دلیل په دې غونډه کې د نورو افغانانو په ځانګړي ډول د دوی د مخالفانو احتمالی او د ښځینه فعالانو حتمي ګډون دی.
څارونکي باور لري، چې که طالبان په دې غونده کې برخه وانخلي او د دوحې غونډې د ناکامولو هڅه وکړي، په دې پسې د بلې او تر دې د جدي او پر طالبانو د سخت فشار راوړلو غونډو او هڅو ته به زمینه برابره کړي.