تاند (پنجشنبه، د دلوې ۱۲ مه) د افغانستان د بیارغونې لپاره د امریکا ځانګړې پلټونکې ادارې سیګار خبرداری ورکړی چې افغانستان سره نړیوالې بشري مرستې ممکن کمې شي.
دغې ادارې ویلي، چې د دې مرستو د کمېدو لپاره ګڼ دلایل شته چې یو له هغو له دې مرستو د طالبانو د رژیم برخمنیدل، یا ورته ګټه رسیدل دي.
دا ادعا، د طالبانو ویاندویانو او چارواکو په پرله پسې ډول رد کړې او ویلي، چې بشري مرستې د ملګرو ملتونو د اړوندو موسسو له لوري مصرفیږي او دوی پکې کوم نقش نه لري.
له دې سره، د ملګرو ملتونو اړوندې بېلابېلې ادارې وخت پر وخت په افغانستان کې د بشري مرستو د اړتیا زیاتیدو خبر ورکوي او ټینګار کوي چې دا مرستې باید زیاتې شي.
د سیګار راپور کې د خپرو شویو معلوماتو پر بنسټ، تېرو څه باندې دوو کلونو کې افغانستان ته یوازې ۲.۹ میلیارد ډالره نغدې مرستې استول شوي چې له ډلې یې ۲.۶ میلیارد ډالره د ملګروملتونو سازمان اړوند مرسته رسوونکو بنسټونو ته ورکړل شوي او مصرف شوي دي.
د طالبانو رژیم د سیګار وروستي راپور او په ځانګړي ډول دې ټکي ته یې غبرګون نه دی ښودلی، چې ګواکې طالبانو ته د دوی تر واک لاندې افغانستان بانک کې په افغانیو د ډالري بشري مرستو له بدلیدو ګټه رسیږي.
د اقتصاد وزارت لپاره د طالبانو د رژیم ویاند عبدالرحمان حبیب بیا وایي، که ملګري ملتونه او نړیواله ټولنه د افغانستان اقتصادي لومړیتوبونو پر بنسټ، پر هغو پروګرامونو کار وکړي چې د کاري فرصتونو د رامنځته کېدو لامل شي، تمرکز وکړي، په تدریجي توګه به د افغانانو اقتصادي وضعیت ښهوالي کې مرسته وکړي.
د طالبانو یو شمېر چارواکو هم مخکې تر دې ویلي، چې ملګري ملتونه دې د بشري مرستو په مصرف کې دوی سره مشوره وکړي او د افغانستان د اړتیاوو له مخې دې دا مرستې ولګوي.
د ملګرو ملتونو د بېلابېلو ادارو د ارقامو له مخې، تر نیمایي زیات افغانان( شاوخوا ۲۹) میلیونه یې بشري مرستو ته اړتیا لري او د دې مرستو نه رسیدل د خوارځواکۍ ځپلو د شمېر زیاتیدو او نورو ستونزو سبب کیږي.
د طالبانو چارواکي بیا په دې اړه راپورونو ته ضدو نقیض غبرګونونه ښيي.
یو شمېر چارواکي د نړیوالو مرستو پر زیاتوالي ټینګار کوي، خو ځینې نور یې داسې راپورونه د دوی خلاف تبلیغات ګڼي او وایي چې د دوی له واکمنیدو سره د خلکو اقتصاد او وضعیت ښه شوی.
عام افغانان بیا په پرله پسې ډول د اقتصادي او بشري وضعیت د خرابیدو شکایت لري او له هېواده د یو زیات شمېر ځوانانو د وتو هڅې له همدې وضعیت سره تړلي بولي.