تاند (دوشنبه، د دلوې ۲ مه) د پاکستان په پلازمېنه اسلام آباد کې نن پوهنتونونه او ښوونځي له دې وېرې تر نامعلومې مودې وتړل شول، چې ښایي وسله وال بریدونه پرې وشي.
د جرمني خبري آژانس ویلي، پر هغو درېیو پوهنتونونو چې د پاکستان پوځ یې اداره کوي د حملو ځانګړی ګواښ شوی دی.
دا پوهنتونونه تر نامعلومې نېټې پورې بند شوي دي.
دا په داسې حال کې ده، چې پاکستان د فبرورۍ په اتمه نېټه ټاکنې هم لري.
د دغو انتخاباتو په درشل کې پر یو شمېر نوماندانو بریدونه هم شوي ، چې هغوی او ځینې پلویان یې وژل شوي.
پاکستاني چارواکو رسماً د تعلیمي مرکزونو د تړلو په اړه څه نه دي ویلي.