تاند (جمعه، د جدې ۲۹مه) له پاکستان څخه د افغان پناه غوښتونکو د لېږد په دوام نن کاناډا ۳۱۹ افغانان د دغه هېواد وینکوور ښار ته ولېږدول.
د کاناډا د حکومت په یوه اعلامیه کې راغلي، چې د دغو کسانو له لېږد سره کاناډا خپلې موخې ته ورسېده او د ۲۰۲۱ اګسټ میاشتې تر دې دمه یې ۴۰ زره افغان کډوال او زیان منوونکي خپل هېواد ته ورلېږدولي دي.
کاناډایي چارواکو د دغو کسانو په اړه نور جزیات نه دي ورکړي.
کاناډا د افغانستان د جمهوري نظام له سقوط څخه وروسته، د بشري او مدني حقونو او ښځینه فعالانو د پناه ورکولو اعلان کړی و.
دغه هېواد ډېرو افغانانو ته پناه ورکوونکی یاد شوی، خو پر اړوندو ادارو یې نیوکې هم شته چې ګواکې په پناه ورکولو کې یې قومي او سمتي چلند کړی او پښتنو فعالانو ته یې لږه پاملرنه کړې ده.