تاند (جمعه، د جدې ۲۲ مه) په کابل کې د چین د ولسي جمهوریت سفیر ښاغلي ژاو شینګ، د طالبانو د بهرنیو چارو وزیر ملا امیرخان متقي سره د لیدنې پر مهال د خپل هېواد ته ستنیدونکو افغانانو لپاره د ۱۰۰ میلیونه چینایي پیسو( یوان) د مرستې ژمنه وکړه.
د ملا متقي دفتر ویلي چې دا لیدنه پرون پنجشنبه وشوه او پکې پر بېلابېلو مسایلو خبرې شوي.
سرچینه زیاتوي: د بهرنیو چارو وزیر چین سره د افغانستان اړیکې مثبتې وبللې او په سیمهییزو او نړیوالو سازمانونو کې یې له افغانستان څخه د چین له ملاتړ مننه وکړه.
متقي وویل، افغانستان ته باید په جګړه کې ښکېل هېواد په نظر ونه کتل شي او په دې اساس د اضافي ځانګړو استازو د ټاکلو اړتیا نه لیدل کېږي.
د چین سفیر په بیجینګ کې د چین د رهبرۍ او دیپلوماتانو وروستیو ناستو کې د چین د دریځ په اړه وویل، د نړۍ ګډ راتلونکي لپاره مهمه ده داسې څو اړخیز نړیوال نظم رامنځ ته شي چې واړه او لوی هیوادونه ټول پکې په مساوي ډول خپلې ګټې وساتلای شي.
ژاو شینګ هیواد ته د راستنېدونکو مهاجرینو لپاره د خپل حکومت له اړخه ۱۰۰ میلیونه یوان مرستې ژمنه وکړه چې د طالبانو رژیم سره به په همغږۍ د مهاجرینو د اړتیاوو پوره کولو لپاره وکارول شي.