تاند (یکشنبه، د جدې ۱۰ مه) راپورونه وایي چې د ایران پولهساتو ځواکونو د نیمروز ولایت د کنګ ولسوالۍ یو اوسېدونکی وژلی دی.
ویل شوي چې دغه کس د کنګ ولسوالۍ په میر احمد کلي کې له نظامي برجک څخه په نښه شوی دی.
د نیمروز کنګ ولسوالۍ ایران ته یوه تر ټولو نږدې ولسوالۍ ده.
د طالبانو د رژیم چارواکو او ایراني لوري په دې اړه څه نه دي ویلي.
څو ورځې مخکې د پاکستاني ځواکونو لخوا ډیورنډ کرښې ته څېرمه د زابل ولایت په یوه سیمه کې هم پر عامو افغانانو د ډزو او یو شمېر کسانو ته د مرګ ژوبلې خبر ورکړل شوی و.
طالب چارواکو په هغې اړه هم رسنیو ته څه نه وو ویلي.