په امریکا کې د یوې الوتکې په لو‌ېدو کې ۳ افغان پېلوټان مړه شول

تاند (دوشنبه، د قوس ۲۷ مه) د امریکا د اورګان ایالت چارواکو تایید کړه چې په دغه ایالت کې د افغانستان د پخواني حکومت د هوايي ځواک درې پېلوټان په یوه هوايي پېښه کې مړه شوي دي.

د اورګان ایالت د پولیسو ادارې نن په یوه خبرپاڼه کې وویل، دا پېښه د شنبې په ورځ (د دسمبر۱۶ مه) په ځايي وخت د مازدیګر په ۴ بجې او ۵۵ دقیقې وشوه چې د دوی یو ماشینه (د یو انجن لرونکې) الوتکه د هافمن واټ په شمال کې ولوېده.

په دغو درو پېلوټانو کې یوه يې الوتکه چلوله او دوه نور د سپرلیو په سیټونو کې ناست وو.
د اورګان ایالت پولیسو د مړه شویو افغان پېلوټانو نومونه محمد حسین موسوي، محمد بشیر صفدري، او علي جان فردوسي ښوولي دي.

پولیس وايي:«لومړنۍ پلټنې ښيي چې الوتکه د برېښنا له مزو سره لګېدلې او له کبله یې اور بل شوی او برښنا پرچاو شوې ده. الوتکه د شدیدې لړې په منځ کې د اورګان د ایالت د هوايي ډګر لور ته روانه وه.»

دوه کاله پخوا ۱۴۳ افغان پېلوټان، چې د هغو په منځ کې څو تنه ښځې هم وې، له تاجکستان او ازبکستان څخه عربي هیوادونو او بیا امریکا ته ولېږدول شول.