تاند(دوشنبه، د قوس ۶ مه) د نورم او سټنډرد ملي ادارې لپاره د طالبانو چارواکو ویلي چې په تېره یوه میاشت کې یې ۱۶۰ ټانکره بې کیفیته تېل چې له ایرانه د افغانستان خاورې ته لېږدول کیدل، پر ګډه پوله بیرته دغه هېواد ته ستانه کړي.
د یادې اداې په یوه اعلامیه کې له سوداګرو غوښتل شوي چې د بې کیفیته تېلو له واردولو ډډه وکړي.
سرچینې زیاته کړې چې تر دې مخکې یې ازبکستان ته هم د بې کیفیته تېلو وارد شوي ټانکرونه بیرته ستانه کړي.
افغانستان ته د بې کیفیته تېلو واردول له پخوا څخه یوه جدي ستونزه وه چې د نقلیه وسایطو د خرابولو تر څنګ به ډېر ځله د هوا د ککړتیا سبب ګرځیده.
د نورم او سټنډرد ملي اداره چې باید د بې کیفیته تېلو او نورو ناسمو وارداتو مخنیوی یې کړی وای، ډېر ځله په دې کار کې پاتې بلل کیده او ویل کیدل چې په دغه اداره کې د مفسدینو د موجودیت ترڅنګ پر جمهوري نظام د جنګسالارانو او مافیایي ډلو د پراخ اغېز له امله د بې کیفیته وارداتو مخه نه شي نیولی.