تاند (سې شنبه، د عقرب ۳۰ مه) د افغانستان نیمروز ولایت ته نژدې د ایران په سیستان او بلوچستان کې د زلزلې له کبله د دغه ولایت په مرکز کې لږترلږه ۲۵ تنه ژوبل شوي دي.
د دې زلزلې، چې نن سهار وختي وشوه، شدت د ریښتر په حساب ۴ اعشاریه ۷ درجې اټکل شوی او مرکز یې تر مځکې ۱۰ کیلومتره لاندې اعلان شوی دی.
ډاکتران وايي، د زاهدان ښار روغتونونو ته اکثره وړل شوي ټپیان د ودانیو د نړېدو له کبله نه بلکې د زلزلې په ترڅ کې له کوره د وتلو په مهال د پرزېدو یا په زینو کې د لوېدو په اثر ټپیان شوي دي.
راپورونه وايي چې د زاهدان د ډېرو ودانیو دېوالونه چاک شوي دي.
په همدې حال کې د سیستان او بلوچستان ولایت نورو سیمو ته پلټونکې ډلې استول شوي چې د احتمالي مرګ ژوبلو او تاوانونو په اړه معلومات راټول کړي.
له زلزلې وروسته اکثره خلک د کورونو په ځای پارکونو ته لاړل او ټوله شپه یې په ازاده فضا کې تېره کړه. زلزله د شپې په ۱۲ بجې او ۴۴ دقیقې وشوه.