تاند:( سې شنبه، د عقرب ۱۶مه) د طالبانو د کډوالو او بیرته راستندونکو چارو وزیر خلیل الرحمان حقاني وايي، په تېرو څو ورځو کې ۳۰۰ زره افغان کډوال له پاکستان څخه هېواد ته راستانه شوي دي.
خلیل حقاني د کندهار په سپین بولدک ولسوالۍ کې د راغلو کډوالو سره د لیدني پر مهال وویل، دغه کډوال به لومړی په سرحدي ولایتونو کې په کېمپونو کې ځای پر ځای او د هوا له سمېدو سره به خپلو سیمو ته انتقال شي .
دا په داسې حال کې ده، چې تازه ستانه شوي کډوال د دوی د پالنې لپاره د تدابیرو او اسانتیاوو له نشتوالي شکایت کوي.
د دوی په وینا، طالبانو په ډاګونو کې خېمو ته ننویستي، چې هلته د اوبو، خوراکي توکیو، تشنابونو، بریښنا او ډېرو نورو لومړنیو اړتیاوو له لرلو محروم دي.
طالب چارواکي بیا وایي، چې هم د دوی ادارو او هم خیریه بنسټونو او ولسي خلکو د را ستنو شویو افغانانو د پالنې لپاره لازمې هڅې کړې دي.