تاند:( دوشنبه، د عقرب ۱۵مه) د هرات لپاره د طالبانو سیمه ییزو چارواکو ویلي، چې ایراني چارواکو یوازې د اسلام کلا بندر له لارې تېره اوونۍ ۲۰ زره کسان هېواد ته شړلي دي.
د اسلام کلا بندر د کډوالو او بېرته راستنېدونکو رییس عبدالله قیومي وویل چې تېره اوونۍ د یاد بندر له لارې ۲۰ زره کسان هېواد ته راستانه شوي دي.
د طالبانو تر کنټرول لاندې باختر اژانس وایلي، راستانه شوي هېوادوال د ایراني پولیسو له ناوړه چلند شکایت کوي او زیاتوي چې له دوی څخه یې په زوره پیسې هم اخیستې دي.
بل خوا د اسلام قلعه لپاره د طالبانو د رژیم کمیسار مولوي حضرت الله اغا وايي، چې هره ورځ تر دوو زرو پورې کسان په قانوني ډول ايران ته داخلېږي.
دا په داسې حال کې ده، چې ایران ته د سفر پر مهال د طالبانو د رئیس الوزرا اقتصادي مرستیال ملا عبدالغني برادر له افغان کډوالو سره د ایران د چلند ستاینه کړې ده.