تاند (پنجشنبه، د میزان ۲۰ مه) د ایران تسنیم خبري اژانس وايي چې د کابل او اسلام اباد ترمنځ په اړیکو کې د ترینګلتیا له زیاتېدو وروسته د طالبانو حکومت یوې پاکستانۍ الوتکې ته اجازه نه ده ورکړې چې د هرات په هوايي ډګر کې کښېني.

ځینو پاکستاني سرچینو ویلي چې په دغه الوتکه کې ۱۰ تنه پاکستاني ډاکتران سپاره وو چې د هرات د زلزله ځپلو د درملنې لپاره راستول شوي وو.

د طالبانو د حکومت او پاکستان ترمنځ اړیکې په پاکستان کې د افغان کډوالو د ځورول کېدو په خاطر ترینګلي شوي دي.

په کابل کې د طالبانو د حکومت چارواکو د پاکستاني ډاکترانو د الوتکې د ناستې د مخنیوي په اړه تراوسه پورې څه نه دي ویلي.

د راپورونو له مخې، د هرات په زلزله کې شاوخوا ۲۵۰۰ تنه مړه شوي او سلګونه نور ژوبل دي.

که څه هم تازه د پاکستان حکومت د ملګروملتو د کډوالو لویې کمیشنرۍ ته ژمنه ورکړې چې د فانوني اسنادو لرونکي افغان کډوال به نه ځوروي خو راپورونه ښيي چې په پاکستان کې د افغانانو ځورول لا هم دوام لري او پولیس له هغو کسانو څخه چې اسناد لري، پیسې غواړي.

د پاکستان حکومت یو میلیون او ۷۰۰ زره افغان کډوالو ته اعلان کړی چې د روان اکتوبر تر پایه له پاکستانه ووځي.

په دومره لنډه موده کې د لکونو کسانو د ایستلو له کبله افغانستان له ستر فشار او حتي ناورین سره مخامخ کېدای شي.