تاند (پنجشنبه، د میزان ۶ مه) د طالبانو د حکومت د بهرنیو چارو وزارت وايي چې عراق ۲۵ افغان بندیان افغانستان ته سپارلي دي.
د طالبانود بهرنیو چارو وزارت مرستیال ویاند ضیااحمد تکل وايي، دا ۲۵ افغانان د قانوني اسنادو د نه لرلو په تور په عراق کې نیول شوي وو.
د ده په وینا، دا کسان په عراق کې بندیان وو او د لازمو اسنادو له ورکولو وروسته کابل ته راستانه کړل شول.
د رسنیو د راپور له مخې، عراق عموماً هغه افغانان نیسي چې بې اسنادو دغه هیواد ته لاړ شي.
خو څرګنده نه ده چې په عراق کې څومره افغانان بندیان دي.
تر ټولو ډېر افغانان په پاکستان او ایران کې بندیان دي چې هر څه موده وروسته یو شمېر کسان د دغو هیوادونو له لوري خوشي کېږي او افغانستان ته سپارل کېږي.