تاند- کافي یا قهوه د کافین د لرلو له کبله پر ګڼو درملو منفي اغیز لري او د دې سبب کېدای شي چې د بدن له لوري د درملو د جذبېدو مخه ونیسی.
اکثره خلک عادت دي چې سهار کافي څښي خو د طب څېړونکي وايي چې له درملو سره یوځای د کافي څښل په بدن کې د درملو اغېز منفي کموي.
یو شمېر څېړونکو پر یو بل د درملو او کافي د اغېز په اړه څېړنې کړي او ورته څرګنده شوې چې کافي د اکثرو درملو اغېز کموي خو دا لس درمل په ځانګړي ډول د یادولو وړ دي.
د ترایید له درملو لکه لووتیروکسین او نورو درملو سره، چې د هورمونونو د انډول لپاره خوړل کېږي، مه څښئ.
د زوکام یا الرژۍ له درملو سره یې هم مه څښئ.
د شکر یا قند له درملو سره په یو وخت د کافي څښل د دې درملو اغېز خورا کموي.
په امریکا کې څېړنو معلومه کړې چې نه یوازې کافي بلکې هر هغه شی چې د کافي په شان کافین لري، په وینه کې د انسولین او قند اندازه زیاتولی شي او د شکر ناروغ ستونزه نوره هم ممکن زیاته کړي.
د الزایمر یا هېرې د ناروغۍ له درملو، لکه ریواستیګمین او ګالانتامین سره د کافي څښل د دغو درملو اغېز کمزوره کوي.
د ساتنګۍ له درملو سره هم کافي ښه نه ده چې وڅښل شی.
د هډوکي د ورستوالي د درملو خاصیت هم تر ډېره له منځه وړي.
هغوی چې د ژور خپګان درمل خوري، پکار ده چې درمل له کافي سره ونه خوري.
د رواني ناروغیو، لکه سکیزوفرني، ذهني پریشاني او نورو ناروغیو له درملو سره هممهاله باید د کافي له ځښلو ډډه وشي.
د وینې د فشار له درملو سره هم باید کافي ونه څښل شي.
د خوب له درملو سره هم د کافي څښل ښه نه دي او د دې درملو اثر له منځه وړي.