تاند (دوشنبه، د میزان ۳ مه) طالبان وايي، د افغانستان د ښارونو لپاره یې په لویه کچه د څارنې د یوې شبکې پر جوړولو کار پیل کړی دی.
د دې معنا دا ده چې دوی هغه سیستم بدلوي چې امریکایانو له افغانستانه تر وتلو مخکې جوړ کړی و.
د طالبانو د کورنیو چارو وزارت ویندوی عبدالمتین قانع رویټرز خبري اژانس ته ویلي چې د داعش پر ضد د دې سیستم په باب یې د چین له هووايي کمپنۍ سره ّم مشورې کړي دي.
د رویټرز د راپور پر اساس، د هغو معلوماتو پر اساس چې د طالبانو او هووايي کمپنۍ ترمنځ له خبرو څخه ترلاسه شوي د نورو ګواښونو ترڅنګ د داعش د حملو مخنیوی، د طالبانو او د امریکا او چین په ګډون د ډیرو هیوادونو د تعامل مرکزي موضوع وه.
رویټرز زیاتوي، ځینې شنونکي د دې پروګرام د عملي کولو لپاره د طالبانو د بې پیسو حکومت پر توان شک ښکاروي او د بشري حقونو ډلو اندېښنې ښکاره کړي چې ممکن طالبان له دې سیستمه د خپلو مخالفانو د ځپلو لپاره کار واخلي.
د تېر جمهوري نظام په وروستیو کې هم په کابل کې د سل میلیونه ډالرو په ارزښت د امنیتي کمرو د نصب موضوع یاده شوه، خو معلومه نه شوه چې هغه پروژه تر کومه ځایه مخته ولاړه.
په ۱۳۹۹لمریز کال کې د پخواني نظام چارواکو په کابل کې د امنیتي کمرو شمېر یوازې ۳۰۰ ښودلی و.
عبدالمتین قانع رویټرز ته وویل:«د کابل ښار په مهمو ځایونو او واټونو کې د ګڼ شمېر کمرو نصب د یوې نوې امنیتي ستراتیژۍ برخه ده چې بشپړتیا به یې څلور کاله وخت وغواړي.»
ده زیاته کړه:«حاضردمه د کابل پر امنیتي نقشې کار کوو چې د امنیتي متخصصانو له لوري د بشپړېدو په حال کې ده او دا ډېر وخت غواړي. موږ اوس دوې نقشې لرو، یوه د امریکا له لوري د مخکیني حکومت لپاره او دوهمه د ترکیې له لوري.»
ده د ترکیې د نقشې د جزییاتوپه اړه څه ونه ویل.
د امریکا د باندنیو چارو وزارت یوه استازي رویټرز ته وویل چې واشنګټن له طالبانو سره شراکت نه کوي او طالبانو ته یې دا خبره کړې چې دا د دوی مسوولیت دی چې په افغانستان کې تروریستانو ته د خوندي پناهځای نه ورکول تضمین کړي.»
د طالبانو د کورنیو چارو وزارت ویندوی وویل، طالبانو په اګست کې د چین له هووايي کمپنۍ سره لنډې خبرې وکړې، خو کومه موافقه یې لاسلیک نه کړه.
ده تېره میاشت ویلي و: «همدا اوس په کابل ښار او نورو مهمو ځایونو کې څه باندې دوه شپېته زره کمرې په ظاهري بڼه نصب شوي. ممکن د پټو کمرو شمېر تر دې زیات وي. دا کار د کابل او نورو ولایتونو په ټولو مهمو او له ګڼې ګوڼې ډکو ځایونو کې شوی، لکه د تګ راتګ پر لارو، هوایي ډګرونو، سرحدونو او ګمرکونو کې، ټولو دغو ځایونو کې امنیتي کمرې نصب شوي دي.»
د څارنې کمرې په ټوله نړۍ کې کارول کېږي او انټرنېټي معلوماتو له مخې چین کې یې شمېر ۷ سوه میلیونو او د امریکا په متحدو ایالتونو کې څه باندې ۷۰ میلیونو ته رسېږي.