تاند (یکشنبه، د میزان ۲ مه) د روسیې د بهرنیو چارو وزیر سرګی لاوروف نن وویل، د دغه هیواد په خازان ښار کې د افغانستان په اړه د مسکو فارمټ / غونډې تمرکز به پر هغو ننګونو بحث وي چې افغانستان ورسره مخامخ دی.
لاوروف وویل، په دې غونډه کې به د افغانستان د ستونزو د حل کولو لپاره د ګاونډیوهیوادونو اقدامات وڅېړل شي.
لوږه، شدیده بېوزلي، د نجونو او ښځو حقونه او د بشري حقونو محدودیتونه هغه اندېښنې دي چې د افغانستان په تړاو په هره نړیواله غونډه کې مطرح کېږي.
ټاکل شوې ده چې د مسکو فارمټ غونډه د روسیې په کازان ښار کې د روانې اوونۍ په پای کې جوړه شي.
په دې غونډه کې د افغانستان د ګاونډیو؛ چین، ایران، ازبکستان، ترکمنستان، تاجکستان او پاکستان ترڅنګ د قزاقستان او روسیې او یو شمېر نورو هیوادونو استازي ګډون کوي.
لاوروف وویل:«مسکو فارمټ به د مسکو پر ځای په کازان کې دایر شي، موږ هیله لرو په دې خبرې وکړو چې ګاونډي هیوادونه له افغانستان سره د خپلو اوسنیو ستونزو په حل کولو کې څنګه مرسته کولی شي.»
د مسکو فارمټ غونډې په ۲۰۱۷ م کال پیل شوې. د دې فارمټ دوې غونډې د طالبانو له واک ته رسیدو وروسته جوړې شوي دي.
ټاکل شوې ده چې د کازان په غونډه کې د طالبانو د بهرنیو چارو وزیر امیرخان متقي ګډون وکړي.