جمعه, مارچ 29, 2024
Homeخبرونهد ملي پراختیا شرکت: د قرنطین موده کې مو ۲۰ زره کسانو...

د ملي پراختیا شرکت: د قرنطین موده کې مو ۲۰ زره کسانو ته کار پیدا کړی

تاند، پنجشنبه، د جوزا لومړۍ: د ملي پراختیا اداره وايي، د ولسمشر له امر سره سم یې په کابل کې د قرنطین په موده کې ۲۰ زره کسانو ته کار پیدا کړی دی.
یاده اداره وايي، ولسمشر د ۴۱ زره کارګرو لپاره روزګار موندلو امرکړی خو دوی تر اوسه توانېدلي چې د کابل ښار د سطحي اوبو د مدیریت، ښه چاپیریال رامینځته کولو، د ځمکې لاندې اوبو د کچې لوړولو په پروژه کې ۲۰ زره کارګر بوخت کړي.

د ملي پراختیا اداره وايي، په دې پروژه کې د ښار د سطحي اوبو د راړولو په موخه تر دې دمه له ۱۴۰۷۰۰ څخه ډيرې وړې کندې کیندل شوې او د اوبو جذبولو او خوندي کولو ۱۷ کوچني بندونه تر کار لاندې دي چې یو کال به وخت ونیسي.

ددې پروژې په دوهم پړاو کې د شین چاپیریال او ځنګلونو د رامنځته کولو په موخه ۱۳ میلیونه نیالګیو کینول په پام کې نیول شوي چې د پالنې او ساتنې په برخه کې به ېې زرګونه کسان په کار بوخت شي: (( ټول کارګر د کلیو او ګذر د وکیلانو لخوا ټاکل او د ملي پراختیا شرکت لخوا په کار ګمارل کیږي.))

د یادونې ده چې د عالي اقتصادي شورا د پریکړې سره سم د کابل ښار د اورښت اوبو مدیریت کولو پروژې مسئولیت د ملي پراختیا شرکت ته سپارل شوی، خو مالي لګښت ېې چې له ۱۲میلیاردو څخه ډيرې افغانۍ کیږي د ملي پراختیا عملیاتي او ملاتړې ادارې له طریقه د دولت له اختیاري پراختیايي کوډ څخه ورکول کیږي.

LEAVE A REPLY

Please enter your comment!
Please enter your name here

- Advertisment -

ادب