تاند: ( جمعه، د سرطان ۲۳ مه) د سولې د نوبل جایزې یوازینۍ پښتنه ګټونکې ملاله یوسفزۍ اندیښنه وښوده، چې له کار او زده کړو د نجونو او ښځو محرومیدل به د افغانستان راتلونکی له منځه یوسي.
نوموړې سي این این تلویزون ته وویل، چې دغه تلف شوی حق باید بې قید و شرطه بیرته اعاده شي.
د طالبانو له بیا واکمنیدو سره، په افغانستان کې نجونو ته یوازې تر شپږم ټولګي د زده کړو اجازه ورکړل شوې او له ښځو د کار او ټولنیزو فعالیتونو حق اخیستل شوی.
دغه وضعیت د طالبانو رژیم په ملي او نړیواله کچه توندو غبرګونونو سره مخ کړی او د انزوا په یوه اصلي دلیل یې بدل شوی.
د طالبانو منتقدان باور لري، چې دوی په داسې پریکړو نړیوال تر فشار لاندې نیسي، څو رژیم یې په رسمیت وپېژني، یا د لا نورو افراطي پریکړو د نه کولو لپاره امتیاز ورکړي.
طالبان بیا ظاهراً د نجونو د زده کړو مخالفت ردوي او ادعا کوي، چې د دغه حق د تامین لپاره یې د لازمو شرایطو د برابرولو په هڅه کې دي.