تاند: ( پنجشنبه، د سرطان اتمه) پاکستاني رسنیو د دغه هېواد د پوځ په حواله اعلان کړی، چې ډیورنډ فرضي کرښې ته څېرمه د داعش ډلې یو مشر او دوه غړي د دوی پر پټنځای له برید وروسته وژل شوي دي.
د پاکستاني رسنیو د راپورونو له مخې، دغه عملیات د پښتونخوا ایالت په “بجور” سیمه کې شوي.
د پاکستان پوځ د دغه هېواد رسنیو ته ویلي چې د داعش مشر شفیع الله د امنیتي ځواکونو له خوا تر تعقیب لاندې و او په بریدونو کې یې لاس درلود.
داعش ډلې د دغې ادعا په اړه څه نه دي ویلي.
پاکستان په وروستیو کې د داعش ډلې د بریدونو د زیاتیدو ادعا کوي او د دغې ډلې له ادرسه هم د یو شمېر پېښو مسوولیت منل کیږي.
د پاکستان منتقدین دغه هېواد د تروریستي ډلو په روزنه او صادرولو تورنوي او باور لري، چې یاد شوی هېواد په خپلو واک لاندې سیمو کې هم ځينې پېښې د دې لپاره کوي، چې ځان د تروریزم له خطره زیانمن وښيي او په دې ډول د نړیوالو مرستې جلب کړي.