تاند:( جمعه ، د جوزا ۱۲ مه ) د کابل ښاروالۍ لپاره د طالبانو د رژیم چارواکي وایي، چې د کابل ښار په ده افغانانو سیمه کې یو عصري ښارګوټی جوړوي.
د ښاروالۍ د ښاري پراختيا رياست واکمنانو د کابل ښار پراختيايي پلان د تاريخي سيمو او آبداتو د ساتنې لپاره خپل پلان د اطلاعاتو او فرهنګ وزارت د هنر او کلتور طالب مرستیال مولوي عتيق الله عزيزي سره شریک کړی.
ده افغانان سیمه، د کابل ښار له هغو سیمو څخه ده، چې لرغونې ودانۍ پکې موجودي دي.
کابل ښاروالۍ ویلي، یاد شوی ښارګوټی د ده افغانانو د سوداګريزو مارکېټونو شاته پلان شوی.
د طالبانو د اطلاعاتو او فرهنګ وزارت د هنر او کلتور مرستيال په دې سيمه کې د ځينو شته تاريخي آبداتو د ساتنې غوښتنه وکړه او ویې ویل، چې د نویو ښارګوټو په جوړولو کې د پخوانیو کورونو يو يا څو نمونې د ياد ګار په توګه وساتل شي.
کابل ښاوالۍ ویلي، د کابل د دوهمې ناحيې د ده افغانانو سيمه کې د يوه عصري ښارګوټي د جوړېدو پلان تر لاس لاندې دی، چې پخوا پکې د ارګ ستور قصر، بوستان سرا، ګلستان سرا يا اوسنی ملي زرنګار پارک شتون لري چې د ساتنې لپاره به پرې غور وشي.