تاند:( جمعه ، د جوزا ۵ مه ) د طالبانو د رژیم د مخابراتي خدماتي خدمتونو د تنظیم ادارې( اترا) ویلي، چې د هېواد په شمال کې د مخابراتي شبکو ۴۴ نوي انتنونه جوړوي.
د طالب چارواکو په وینا، دا آنتونونه به د بلخ، جوزجان، فاریاب، سرپل او سمنګان ولایتونو په هغو سیمو کې نصب شي چې د مخابراتي شبکو خدمات نه وررسېږي.
د اترا ادارې طالب رییس حافظ محمد ثابت نعمان وايي تراوسه، د جوزجان ولایت په قوش تېپې او درزاب ولسوالیو کې ۳ انتونونه فعال شوي او په راتلونکو دوو میاشتو کې به په ټولو پنځو ولایتونو کې د ۴۱ آنتنونو د رغونې چارې بشپړې شي.
دا په داسې حال کې ده چې د هېواد له نورو ولایتونو څخه هم د کمزورو مخابراتي خدماتو شکایتونه رارسېږي.
طالبان د جمهوري نظام خلاف د جګړې پرمهال د مخابراتي انتونو په الوزولو تورنیدل، خو له بیا واکمنیدو سره یې اوس د دغو انتنونو د زیاتولو خبر ورکوي.