تاند:( شنبه ، د غویي ۹ ) د ملګرو ملتونو نړیوال سازمان وایې، چې د افغانستان په اړه د دغه سازمان له لوري د دوحې په جوړیدونکې غونډه کې د طالبانو استازیو ته د ګډون بلنه نه ده ورکړل شوې.
د ملګرو ملتونو د سرمنشي ویاند سټیفان دوجاریک ویلي، چې سرمنشي انټونیو ګوټېرېش طالبانو ته د ګډون بلنلیک نه دی استولی.
ټاکل شوې، چې د دوحې غونډه دوشنبې او سې شنبې په ورځو چې د غويی ۱۱ مه او ۱۲مه کیږي د قطر په پلازمېنه دوحه کې ترسره شي.
مخکې د ملګرو ملتونو د سرمنشي مرستیالې آمنه محمد ویلي وو، چې په دې غونډه کې ښایي د طالبانو د په رسمیت پېژندلو په اړه پریکړه وشي.
د نوموړې دا خبره له پراخو مخالفتونو سره مخ شوه.
تازه، د ملګرو ملتونو امنیت شورا په یوه پریکړه لیک كې پر طالبانو غږ کړی چې که د ښځینه وو تروړل شوي حقونه ژر بیرته تامین نه کړي، بندیزونو سره به مخ شي.
ایران بیا ویلي، چې طالبانو د افراطي پریکړو له دوام سره، د دوحې غونډه کې د دوی د په رسمیت پېژندنې بحث له اجنډا غورځولی.