تاند (شنبه، د ثور ۱) په تورخم کې د مځکې د ښوییدو په وروستۍ پېښه کې د مړو شویو کسانو شمېر ۸ تنو ته ورسید.
د سې شنبې په ورځ (د اپریل ۱۸) د ډیورند کرښې پورې خوا ته د خیبرپښتونخوا اړوند د تورخم په سیمه کې مځکه د پاکستاني پوځیانو د یوې پوستې خوا ته په داسې حال کې وښوییده چې تر ۱۰۰ ډیر کانتینرونه له مالونو ډک انتظار ولاړ وو.
د پاکستاني ژغورونکو ویندوی بلال فیضي فرانس پریس خبري اژانس ته ویلي:«تراوسه پورې د ۷ تنو مړي راایستل شوي، عملیات لا هم دوام لري چې اتم مړی له خاورو راوایستل شي.»
د خیبرپښتونخوا په دې سیمه کې ټولټال ۲۰ کانتینرونه او لارۍ تر خاورو لاندې شوي دي.
په پیل کې چارواکو د دوو تنو د مړینې خبر ورکړی و.
دا پېښه د تورخم له دروازې یوازې ۱۲۰ متره لېرې شوې ده.
فیضي ویلي:«زموږ ژغورونکي د اتم مړي د خښېدو ځای ته ورنژدې شوي. موږ خاورې په سلو کې ۶۰ لېرې کړي، خو پرون په همدغه سیمه کې بیا مځکه وښوییده او له کبله یې د ژغورنې عملیات وځنډېدل.»
په تورخم کې مرستیال کمیشنر عبدالنصیر خان د اتو تنو مړینه تایید کړه او ویې ویل چې د پنجشنبې په ورځ لاره د موټرو پر مخ پرانیستل شوه.