تاند (سې شنبه، د حمل ۱۵مه) د راپورونو له مخې، د نیمروز ولایت په مرکز زرنج کې د طالبانو او داعشیانو ترمنځ د تېرې شپې په نښته کې دواړو خواوو ته مرګ ژوبلې اوښتې دي.
راپورونه وايي چې نښته تېره شپه د زرنج په معصوم آباد کلي کې وشوه او په ترڅ کې یې لږترلږه ۱۰ داعشیان او ۳ طالبان وژل شوي دي.
د طالبانو حکومت ویلي چې د دوی خواکونو په معصوم اباد کلي کې د داعش وسله والو پر یوه پټنځای عملیات وکړل او کابو دوه ساعته یې دوام وکړ.
له دې سره هممهاله د بلخ ولایت مرکز ته نژدې په نهر شاهي ولسوالۍ کې د داعش او طالبانو ترمنځ په نښته کې د طالبانو په وینا ۶ داعشیان ووژل شول.
د شپې په شاوخوا ۹ بجې په سیمه کې نښته پیل شوه او څو ساعته یې دوام وکړ. د طالبانو د حکومت د بلخ د امنیه قوماندانۍ د ویندوی محمداصف دراني په وینا، طالبانو په نهر شاهي ولسوالۍ کې د داعش پر یوه پټنځای عملیات وکړل او د ۶ داعشیانو، چې ده خوارج وبلل، په وژلو پای ته ورسیدل.
ده ادعا وکړه چې په دې عملیاتو کې طالبانو ته مرګ ژوبله نه ده اوښتې.