تاند:( پنجشنبه، د حمل ۳) په سویلي زون کې د طالبانو د پوځي محکمې رئیس مولوي غلام رسول احساس په هلمند او کندهار کې د روژې په مناسبت د ۷۴ بندیانو د خوشې کیدو خبر ورکړی.
نوموړي ویلي، چې دغه بندیان د طالبانو د نا لیدل شوي مشر ملا هبت الله اخوندزاده په امر خوشې شوي.
طالب مقام د دغو بندیانو د قضيو په اړه څه نه دي ویلي.
د خوشې شویو بندیانو له تصویرونو داسې ښکاري، چې طالبانو خپل بندي کړي امنیتي کسان له بنده خوشې کړي دي.
دا په داسې حال کې ده، چې د بشري حقونو نړیوال بنسټونه د طالبانو رژیم د خپلو سلګونه منتقدانو په بندي ساتلو تورنوي.
طالبان په دې اړه د نړیوالو بنسټونو راپورونه بې بنسټه بولي.