تاند (سې شنبه، د حمل ۱) د افغانستان د پلازمېنې کابل په شمول په یو شمېر ولایتونو او دغه راز د پاکستان په شمال کې نن ماښام د شدیدې زلزلې ټکان احساس شو.
رویټرز خبري اژانس وايي، چې د دې زلزلې ټکن د هند په پلازمېنه نوي دیلي کې هم احساس شوی دی.
هندي رسنۍ بیا وايي، د دې زلزلې، چې شدت یې د ریښتر په حساب ۶ اعشاریه ۸ درچې و، مرکز د افغانستان دهندوکش په غرونو کې تر مځکې ۱۸۴ کیلومتره لاندې و.
د زلزلې ټکانونه پر ډیلي سربېره په نویدا او شاوخوا سیمو کې یې هم احساس شوي دي.
تاجکستان هم ویلي چې د دغه هیواد په یو شمېر سیمو کې د زلزلې ټکان احساس شوی دی.
د جرمني د زلزله پېژندنې ادارې د دې زلزلې شدت د ریښتر ۶ اعشاریه ۵ درجې اټکل کړی دی او د هغې مرکز یې له کلفګان څخه ۹۰ کیلومتره لېرې تر مځکې ۱۸۷ کیلومتره لاندې ښوولی دی.
فرانس پریس خبري اژانس ویلي چې دې زلزلې ۳۰ ثانیې دوام وکړ او د امریکا د جیالوجیکي سروې ادارې د هغه شدت ۶ اعشاریه ۵ اټکل کړی دی.
تراوسه پورې په افغانستان او پاکستان کې د دې زلزلې له کبله د مرګ ژوبلو او تاوانونو په اړه کوم راپور نه دی ورکړای شوی.
د زلزلې ټکانونو کابل ښاریان په تیره بیا هغوی چې په لوړو ودانیو کې اوسي، سخت وبیرول.
د تېر کال په جوزا کې شدیدې زلزلې په خوست او پکتیکا ولایتونو کې زر تنه مړه کړل او زرګونه خلک بې کوره کړل.
د پکتیکا او خوست زلزلو تر څو میاشتو پورې دوام وکړ.
په وروستیو ورځو کې د افغانستان یو شمېر ولایتونو ته سړه څپه راغلې او د هوا پېژندنې ادارې اټکل کړی چې په ۲۱ ولایتونو کې به واوره یا باران واوري.