تاند:( چار شنبه، د کب ۱۷)   د افغاني سرې میاشتې ټولنې لپاره د طالبانو د رژیم عمومي سرپرست رئیس مولوي مطیع الحق خالص، د افغانستان لپاره د اسلامي همکاریو سازمان له پلاوي غوښتي، چې د افغانستان سوالګرو سره مرستې وکړي.

د دغې ټولنې په یوه خبرپاڼه کې راغلي، چې مولوي خالص د یاد شوي سازمان له ځانګړي استازي طارق علي بخیت او ورسره  ملګري پلاوي څخه د طبیعي پېښو د زیانمنو ترڅنګ د سوالګرو له کورنیو سره د نقدي مرستو، د رواني ناروغانو د ساتنې او درملنې او د زړه په سوري والي د ناروغۍ اخته ماشومانو د درملنې په برخو کې د اسلامي همکاریو سازمان د لاسنیوي غوښتنه وکړه.

نوموړي وویل: “یادې درې برخې لوړ لګښتونه لري او افغاني سره مياشت په يوازې ځان نه شي کولاى دې بار ته دوامداره اوږه ورکړي؛ مونږ هیله من یو د اسلامي همکاریو سازمان زمونږ لاسنیوی وکړي”.

د طالبانو د خبرپاڼې له مخې، د اسلامي همکاریو د سازمان ځانګړي استازي ښاغلي طارق علي بخیت په یادو درې برخو کې د همکارۍ ترڅنګ د افغاني سرې میاشتې په لاسنیوي کې د هر ډول همکارۍ ډاډ ورکړی او د انسان د وجود د مصنوعي غړو د یو مرکز په جوړیدو کې یې د همکار ژمنه کړې.

 طالبانو په داسې مهال د اسلامي همکاریو له سازمان څخه د سوالګرو د کورنیو په ګډون نورو بېوزلو سره د مرستې غوښتنه کړې، چې چارواکي یې په ټول هېواد کې د سوالګرو د را ټولولو او ورته د معاشونو د ورکړې د پلان خبر ورکوي.

تراوسه دغې ډلې یوازې د کابل ښار د سړکونو له غاړو سوالګر ټول کړي، چې سره میاشت یې په پالنه کې خپله ناتواني څرګندوي.