تاند: ( چار شنبه، د کب ۱۷ مه) د هلمند ځایي اوسیدونکي شکایت لري، چې له دې ولایت څخه پاکستان ته د څارویو قاچاق زیات شوی.
د دوی په وینا، له دې سره په هلمند کې د غوښو بیې لوړې شوي، چې دوی یې ستونزو سره مخامخ کړي دي.
په ورته وخت کې د دغه ولایت مالداران او کوچیان وایي، چې د اقلیمي بدلونونو، وچکالۍ زیاتیدو او څړ ځایونو د نشتوالي له امله د څارویو پالنه او زیاتیدل ورته ستونزمن شوي.
د هلمند ښاروالۍ ویاند محمد ظاهر ابشار مني، چې په دغه ولایت کې د غوښو بیې لوړې شوي، خو وایي په دې اړه د ښاروالۍ د بیو د کنټرول ټیمونه لاس په کار شوي.
پاکستان ته د افغان څارویو د لېږد په اړه یوازې هلمندیان شکایت نه لري؛ ورته شکایتونه ډیورنډ فرضي کرښې ته له پرتو نورو ولایتونو هم رسنیز شوي او د طالبانو د رژیم چارواکي په دې برخه کې په بې غورۍ تورن شوي.