تاند:( شنبه، د کب ۱۳) په هرات کې د طالبانو د عملیاتو پر مهال تېره شپه ۶ تنه داعشیان وژل شوي دي.
د هرات لپاره د طالبانو امنیې قومندانۍ ویلي، چې دغه کسان د هرات ښار د څوارلسمې امنیتي حوزې په یوه کور کې وژل شوي او یوه ښځه هم په وژل شویو کې شامله ده.
طالبانو د دغو عملیاتو او جګړې په اړه نور څه نه دي ویلي.
ځایي خلک وایي، چې د عملیاتو پر مهال داعش ډلې څو ساعته مقاومت کړی، خو نه پوهیږي چې طالبانو ته څومره مرګ ژوبله پکې اوښتې ده.
داعش ډلې په دې اړه څه نه دي ویلي.
په وروستیو کې، په افغانستان کې د داعش ډلې د پراختیا په اړه اندیښنې زیاتې شوي دي.