تاند: ( چار شنبه، د حوت ۱۰ ) د افغانستان لپاره د امریکا مخکینی ځانګړی استازی زلمی خلیلزاد د طالب مشرانو تر منځ د جدي اختلافاتو خبر ورکوي.
نوموړي له بي بي سي فارسي سره په تازه مرکه کې د یو شمېر طالب مشرانو وروستیو اعتراضي څرګندونو ته په اشارې وویل، چې د دوی ترمنځ د اختلافاتو خبره ریښتیا ده.
د خلیلزاد په باور، طالب مشرانو سره یې اوس هم اړیکې شته او محسوسوي، چې د دوی یوه برخه مشران هم شرایط درک کوي او د اصلاحاتو غوښتونکي دي.
خلیلزاد په دې اړه، چې دغه اړیکې یې په کومه سطحه موجودې دي، وویل:( په هماغه یوه سطحه اړیکې لرم.)
د نوموړي اشاره ممکن د طالبانو د قطر سیاسي دفتر غړو ته وي، چې خلیلزاد سره یې په دوحه کې د طالبانو د سولې تړون لپاره مذاکرات وکړل.
د طالبانو د دغه پلاوي مشري ملا عبدالغني برادر کوله.
خلیلزاد مخکې ملا برادر پر افغانستان مېن سیاستوال ګڼلی و.
نوموړي په دې اړه، چې د طالبانو خپلمنځي اختلافات به کوم حل ته ورسیږي کنه، نور څه ونه ویل.
دا په داسې حال کې ده، چې د طالبانو ویاندویان او مشران تل د دوی ترمنځ د اختلافاتو موضوع بې بنسټه بولي.